Mestura no Camiño
A Ong Mestura lanza ‘Mestura no Camiño’, unha iniciativa que busca o intercambio de experiencias e a relación activa entre poboación e cultura no marco do proxecto “O Teu Xacobeo” da Xunta de Galicia
A primeira das accións céntrase na captación de persoas voluntarias interesadas en aportar experiencias neste percorrido.
A Ong Mestura, situada no concello de Culleredo, comeza dende hoxe a iniciativa MESTURA NO CAMIÑO co obxectivo de facilitar a relación activa entre poboación e cultura, fomentando o desenvolvemento e a participación social así como o intercambio de experiencias. Para acadar esta meta, a iniciativa conta co apoio da Xunta de Galicia que, a través do programa “O teu Xacobeo”, colabora no proxecto cunha achega de preto de 13.000 euros
O proxecto pretende dinamizar o Camiño Inglés entre A Coruña e Santiago de Compostela pasando por terras do interior: Culleredo, Cambre, Carral, Mesía, Ordes e Oroso a través de tres liñas de acción:
- Potenciar a formación de persoas voluntarias da entidade para que proporcionen información, orientación e coñecemento sobre o patrimonio cultural.
- Achegar a diversidade cultural que ofrece o Camiño aos peregrinos/as nas diferentes rutas.
- Promocionar un espazo que visibilice vivencias e recursos existentes do Camiño e promova a convivencia intercultural.
Neste senso, a primeira acción e a mais inmediata é a captación de persoas voluntarias interesadas en aportar experiencias neste percorrido.
Para iso, desde a ONG Mestura faise un chamamento a todas as persoas dos concellos e fora deles que queiran colaborar no proxecto. Unha vez feita a selección e formación dos/as voluntarios/as darase paso a segunda das fases que se iniciará no mes de xuño, e sempre e cando a situación epidemiolóxica o permita.
